!نصايح لتوفير مصاريف شراء الملابس حتي النصف

تقدر تقولي عشان تنزل تجيب هدوم دلوقتي هتعمل حسابك في كام و انت نازل ؟

مثلا لو الطقم دلوقتي مكون من قميص و بنطلون و جزمة و بلوفر ممكن يبقي بالف جنيه او اكتر طبعا  لو هتجيب حاجة محترمة بعد الاسعار الرهيبة دي , و يا ريت متفكرش تجيب جاكيت اتصرف تقل من تحت احسن و لوعايز توفر فيه هتلاقي حاجات ارخص بس حاجات تعبانة و اشكال اي كلام .

طب ايه الحل؟

الحل سهل لازم تفكر شوية و ننظم حياتنا في لو عملت كدة هتلاقي الدنيا فرقت كتير معاك في كل حاجة مش الهدوم بس انا عارف انك زهقت و عايز الحل بص يا سيدي:

1- ابعد عن الماركات

اسم و خلاص اعمل حسابك انك بتدفع اكتر من ضعف تمن الحاجة اللي بتشتريها عشان اسمها بس.

2 -اشتري في ال sale  بس 

هات كل اللي انت عاوزه و شيله للseason بتاعه عشان غالبا الsale  بيتعمل علي اللبس الشتوي في اخر الشتا و العكس.

3-اشترك في نشرة المعارض المشهورة و استغل العروض 

 لما بتروح تشتري حاجة بياخد منك رقم تليفون و هو بعد كدة لو في اوفر بيبعتلك الحق في offer  علي طول و ساعات الoffer  بيكون مثلا لو خدت قطعة تاخد واحدة التانية يعني تجيبها ليك انت و صاحبك و تدفع نص التمن , متجبهاش مرتين بلاش ذكاء و لو الoffer علي مبلغ معين هات صاحب تاني عادي و اشتروا مع بعض و استفيدوا من العرض . 

4-لو لسة نفسك في ماركات اشتري من outlet  

كل الماركات المشهورة بيبقي عندهم outlet ده بيبقي منتجات الاشركة الاصلية بس مش بيقدر يبيعها في المعارض الرسمية بتاعته عشان فيها عيوب صناعية بسيطة و طبعا عايز يحافظ علي اسمه المرتبط بالجودة و بيبيع الحاجات دي في محلات لوحدها بس بسعر اقل ممكن يوصل لنص التمن , غالبا مش هتلاقي كل المقاسات و مش هتلاقي كل الالوان بس الموضوع يستحق زيارة ممكن تلاقي حاجة لقطة .

5-جرب تشتري اونلاين

الحاجة بتبقي ارخص عشان في توفير في ايجار محل و رواتب موظفين و غيرها , بس خلي بالك من المقاسات و الجودة و دي انصحك انك تشتري من اماكن اللي عندها سياسة استرجاع او استبدال لو معجبكش حاجة . جرب الاول في حاجة رخيصة و مش هتفرق معاك في المقاس بالظبط , اشتري حاجات زي الشرابات و ملابس البيت و تيشرتات سادة و ملابس داخلية اونلاين بتبقي ارخص و فيها عروض علي الكميات و كمان مش هتندم اوي لو مقاس حاجة طلع مختلف حاجة بسيطة . 

6-اشتري حاجات موضتها مش بتخلص

اشتري حاجات تقدر تلبسها اكتر من سنة , يعني مثلا كان في موضة بنطلون جينز الوان متعددة و نازل تحت مسمي "شينوز" و كانت الوان فاقعة وساعتها محدش كان بيعلق عليها بس تخيل بعد سنتين مثلا نزلت الشار لابس بنطلون لونه احمر ! , بالنسبة للبنات جت عليهم فترة كانوا بيلبسوا حاجات فسفوري و دي بصراحة شكلها وحش طول الوقت ! 

7-اشتري اللي محتاجه بس 

اي حاجة موجودة في دولابك مش بتلبسها يبقي انت خسران فلوسها , اشتري اللي ناوي تلبسه بس و محتاجه و متشتريش حاجة شكلها عجبك و ممكن تلبسها في يوم من الايام , يعني متشتريش جزمة بوت عجبتك و انت اصلا بتروح الشغل و تلبس جزمة كلاسيك طول الوقت و لما بتخرج بتلبس جزمة للمشي خفيفة عشان رجلك و جعتك من الكلاسيك طول اليوم ! و حتي لما بتروح في اجازة بتروح مصيف و بتلبس اي حاجة ما عادا البوت, عيش عيشة اهلك و ابقي اشتريه لما تسافر اوروبا و لا حاجة . 

8-اشتري مقاس اكبر شوية و بعدين فصله 

لو رحت محل و عنده عروض علي حاجات عجبتك و اسعار ممتازة بس مش لاقي مقاسك , لو لقيت حاجة مقاسها اكبر برقم او اتنين اشتريه و بعدبن ابقي فصله علي مقاسك عند خياط محترم , لو فرق المقاس كبير هيبقي صعب يتفصل عشان هيبقي شكله غريب شوية عليك .

شراء الملابس بشوية تخطيط ممكن يوفر عليك فلوس كتير من غير اي تنازلات