اهم الخطوات في طريقك للثراء

تحديد هدفك 

لو محددتش اهدافك من الاول صعب انك تكون ثروة , عشان رؤيتك هتبقي مشوشة و ممكن اي حاجة تغير وجهتك بسهولة , دي تقريبا اهم خطوة في الموضوع و من غيرها مش هتعرف تكمل للاخر , لازم تحدد معني كلمة غني بالنسبة ليك وليه عايز تبقي غني , يعني ممكن بالنسبة لي لو معايا مليون جنيه يبقي حاجة حلوة اوي و ممكن واحد تاني شايف ان اقل حاجة 10 مليون و كل واحد شايف رقم معين هو تعريفه للثراء.

 السؤال الاهم انت عايز تبقي غني ليه ؟ اكيد مش عايز تشيلهم في البنك و تتفرج عليهم ممكن يكون هدفك انك تبقي غني بحيث انك تعرف تشتري لبس و تسافر و تروح فنادق و تلف العالم من غير ما تقلق علي محفظتك و فيه واحد تاني شايف انه عايز يبقي غني عشان يجيب عربية فخمة و يسكن في حي راقي و يروح النادي مثلا و يمارس حياته عادي.

 كل واحد و ليه رؤية بس لو معندكش هتفضل تجري ورا سراب انت مش عارف توصل له و تعيش حياتك كلها حاسس بالاحباط عشان  لما عملت المليون بصيت انك عايز 10 و تتعب عشانهم و اول لما توصل تقول انا عاوز 100 وهكذا و هتلاقي عمرك جري و نسيت حياتك الطبيعية و علاقاتك مع الناس بقت ضعيفة و  فاتك لحظات مهمة مع اولادك حفل تخرج او مسابقة في المدرسة كانوا نفسهم تكون معاهم فيها .

 مش هتعرف تستمتع بالفلوس لان صحتك مبقتش زي الاول و في حاجات كتير مش مناسبة لسنك وتقعد حزين كدة و تموت و تسيب الفلوس لحد تاني يعيش بيها او يهدرها 

اعرف المبادئ

مجرد ما تعرف انت عايز" ايه" و" ليه" تيجي خطوة "ازاي "
المباديء بسيطة جدا :

• عشان الفلوس اللي معاك تزيد اصرف اقل من اللي بتقبضه 
• في حد ادني للتوفير بس مفيش حد اقصي للمرتب اشتغل علي نفسك و طورها عشان تقدر تكسب فلوس اكتر سواء زيادة في المرتب او شغل خاص 
• اصرف فلوس اكتر علي الحاجات اللي بتجيب فلوس او قيمتها بتزيد asset  زي بيت او شقة و دهب و غيرها
  اصرف فلوس اقل علي الحاجات اللي بتاخد منك فلوس و قيمتها بتقل liability  زي عربية او موبايل و غيرها
  القرار نسبي بس لازم يحدده اولوياتك 
• الثراء مش صدفة و مش سريع زي ما انت متخيل

المباديئ معروفة لكل الناس بس اللي بيبقي غني هو اللي بيلتزم بيها ولفترة طويلة من غيرما يتاثر بسهولة باي مغريات 

اتخاذ القرارات مسبقا 

مارك زوكربرج اشهر مثال علي البساطة بالنسبة لراجل ملياردير تقريبا بيلبس نفس اللبس تي شيرت و و بنطلون جينز و كان تعليقه انه مش فاضي يضيع وقت او يستهلك جزءمن الطاقة اللي بياخد بيها قرارات في حاجات تافهة او هامشية زي كدة و يوجهها لقرارات مهمة في العمل وحياته المهنية , و ستيف جوبز برضو كان كدة رغم انه ملياردير.

انت المفروض تعمل كدة مثلا تحدد قوانبين معينة خاصة بيك تساعدك  في توفير فلوس او تسهل عليك عمل فلوس اكتر , مثلا ممكن تقرر انك مش هتشتري حاجة الا لما يكون عليها عرض مهما كانت الظروف و ساعتها كل لما تروح محل تشتري لبس مثلا و تشوف حاجة كويسة و مش عليها عرض هيبقي القرار جاهز و مش هتستهلك دماغك في التفكير تجيبها و لا لأ و الفلوس اللي معايا تكفي الشهر ده و نأجل حاجات تانية للشهر الجاي و كدة و ساعتها هتدور علي حاجة تانية و بسعر مناسب و كل فترة تقييم القرارات دي كانت مريحة ليك و لا لا و تغيرها و تعيش معاها , مثلا قرار تاني انك عمرك ما هتستلف فلوس من حد , كل لما يجيلك فرص شراء حاجة او حتي استثمار القرار جاهز الفلوس اللي معايا تكفي و لا لا و لو مش هتكفي يبقي ادور علي حاجة تاني 

او انك مش هتشتري اكل من برة عشان صحة بطنك و محفظتك 

حاجات زي كدة هتفرق معاك علي المدي البعيد 

التخلص من العادات المالية السيئة بالتدريج

لازم تحدد العادات السيئة و اللي بتأثر علي ميزانيتك , لو راجعت مصاريفك هتلاقي دايما حاجات انت متخيل انها بسيطة بس مع تراكمها بتعمل مبلغ , زي مثلا انك بتحبب تتسلي و تاكل شيبسي او بسكويت او غيرها و كل لما يقابلك كشك لازم تنفعه باي حاجة لو حسبت انت بتصرف قد ايه في اليوم هتلاقي حاجة بسيطة ممكن 5 او 10 جنيه طب في الشهر ممكن تعمل 150-300 جنيه او اكتر ممكن تعمل بالفلوس دي حاجات تانية مش هقولك تحوشها مثلا ممكن تروح مطعم كويس و تاكل اكلة محترمة لو وفرت نص المبلغ اللي بتصرفه , الكلام ساري علي السجاير او انك تروح القهوة كل يوم و تطلب حاجات كتير و الوقت بيعدي و مسش بتحس بنفسك و هتلاقي مرتبك خلص فجأة قبل نص الشهر.

حدد العادات اللي بأثر علي مصاريفك وبعدين اعمل نظام يخليك صعب ترجع للعادات دي ,

ازاي تحدد عاداتك ؟ 
تحديد العادات سهل ممكن تسجل مصاريفك بالتفصيل لمدة شهر اي حاجة حتي لو اشتريت علبة لبان سجلها , مش لازم اكسل شيت و لا حاجة ممكن و رقة و قلم صغيرين و تكتب تاريخ اليوم و كل لما تشتري حاجة تسجلها

مثال كدة ليوم واحد
1/1/2017
2 مواصلات مترو
4 عصير
12 غداء مطعم كذا
20 تاكسي
20 كارت شحن

و مع الوقت هتلاقي عندك كمية معلومات كويسة تقدر تتابع فيها الفلوس بتتسرب فين
مش مطلوب منك تعمل الموضوع طول الشهر لو مش قادر ممكن تبدأ باسبوع
 و بعدين تقعد مع نفسك و تصنف المصروفات ل 3 او اربع انواع
مواصلات , اكل من برة , تليفون, فواتير و مصاريف ثابتة , مصاريف للبيت , لبس, .. الخ
هتلاقي مثلا انك بتصرف كتير علي الاكل من برة كتير علي الرغم ان البيت فيه اكل كويس و الحاجة الله يكرمها مش مقصرة معاك و اكلها حلو و كمان نوعية الاكل دي مقصرة علي صحتك .

 بعد ما حددت العادة تيجي خطوة تصميم خطة للتخلص من العادة السيئة و تنفيذها
 اقتراح اعمل ساندويتش كويس الصبح تصبيرة في الشغل لغاية لما اروح و بعدين تاكل في البيت
مش لازم تمنع موضوع الاكل من برة كله بس لو وفرت الفلوس هتقدر تستفيد بيها في حاجة تانية اهم زي انك تشتري لبس بالفلوس اللي وفرتها في شهرين
 اعتقد انك فهمت الفكرة

الاهتمام ببناء عادات جيدة هتفرق معاك علي المدي القريب و البعيد

نسبة كبيرة من الناس اللي مسيطرين علي مصاريفهم عاملين ميزانية , يعني بيسجلوا مصاريفهم و مقسمين مصارفهم من اول الشهر و عارفين الحدود اللي هيوقفوا عندها و هيمسكوا علي نفسهم لغاية اخر الشهر في البند ده 

لو اهتميت بانك تعمل نظام زي كدة هتفرق معاك جدا , بس انا مش بركز في الحاجات دي و ساعات بنسي

تصميم العادة بيبدأ بانك تقسمها لخطوات صغيرة و تنفذها واحدة و احدة مثلا انت محتاج حاجة تسجل فيها ممكن تجيب نوتة صغير و قلم و تخليهم في جيبكعلي طول حتي لو مسجلتش او انك تكتب علي برنامج المذكرات علي موبيالك
تاني خطوة انت محتاجة حاجة تفكرك
احسن وقت تسجل فيه هو اول لما تصرف الفلوس تروح مسجل في الورقة بتاعتك في وقتها ,
تاني احسن حاجة انك تعمل زي منبه بيتكرر كل اربع ساعات بيفكرك تسجل اللي صرفته و كل لما يرن تحاول تفتكر صرفت ايه و تكتبه و مع الوقت مش هتحتاج منبه و ممكن تيجي في اخر اليوم وتكتب كل حاجة اختار النظام اللي يعجبك و التزم بيه

 تطوير و تحسين نظامك

كل واحد و نظامه مختلف عن التاني بس في حاجات مشتركة ما بين الناس الناجحين لازم ناخد بالنا منها , لازم يكون عندك هدف محدد و عندك نظام و خطة هتوصلك للاهداف دي , مفيش حاجة بتبعهم عن اهدافهم مفيش يوم بيقولوا انا اشتغلت كتير امبارح هريح النهاردة !
اعمل النظام المناسب ليك و التزم بيه  و كل فترة راجع نفسك و زود او شيل اللي مش عاجبك في النظام لغاية لما توصل لحاجة مريحاك بس في نفس الوقت هتوصلك لهدفك