ازاي تخلص من ديونك

جزء كبير مننا بيقع في دايرة الديون و مش بنعرف نخرج منها سواء مثلا بعد جواز مثلا او في الحياة عامة بتيجي مصاريف مفاجأة و مش بيكون معاك حقها و بتضطر تستلف علي امل انك تسدد بعدين و بعدين تلاقيحاجة تانية تخليك تستلف تاني , و مع الوقت هتلاقي الديون تراكمت و مش عارف تسددها و تبقي متوتر اغلب الوقت

لازم تسيطر علي مصاريفك العادية
اول حاجة لازم تقعد مع نفسك و تشوف فلوسك بتصرفها فين و ايه سبب انك استلفت و اعمل حصر بكل الفلوس المطلوب سدادها وتحدد سبب السلف , خطوة زي كدة تعتبر 50 في الماية من الحل و بعدين تقعد مع نفسك و تحدد لنفسك ميزانية هتصرف كام الشهور اللي جاية و هتقدر تطلع علي جنب مبلغ ثابت كل شهر تسدد بيه ديونك بالتدريج , اهم حاجة ان تبقي واقعي و تطلع نسبة منطقية تسدد بيها ديونك مثلا من 10 ل 20 في الماية عشان تضمن انك تستمر في السداد و متتزنقش و تستلف تاني .

متستلفش من حد تاني
متستلفش تاني و حاول تأجل اي مصاريف كبيرة الفترة الجاية, مفيش موبايلات جديدة مفيش لبس جديد لمدة كام شهر و كدة و لو حصل حاجة مفاجأة حاول تاجل مصاريفها زي مثلا لو العربية عطلت متصلحاش ! ,اركنها و مش حالك لمدة شهر او اتنين و قضيها مواصلات.

رتب اولوية ديونك
 لو ديونك فيها ديون كروت ائتمانية رتب الكارت اللي فايدته اعلي هو اللي يتدفع الاول , و لو تقدر توجه نسبة كبيرة من الفلوس ليه هيبقي زي الفل و بعدها الكروت اللي فايدتها اقل و بعدها الاشخاص العاديين , حاول تتفاوض مع الدائنين و تكلمهم علي انهم يقسطولك الديون علي فترة اطول مثلا 6 شهور او سنة و كمان ممكن تكون رخم شوية تطلب تبدأ دفع الاقساط بعد شهر او 2 كمان ! في  الشهرين دول ممكن تقفل ديون الكروت و تخلص من هم الفوايد , و بعد ما تخلص من الكروت الائتممانية الغيها خالص و انساها.

اول كام شهر هيبقوا صعبين بس بعد ما تخلص من بعض الديون هتحس ان الضغوط قلت و بدل ما كنت مديون ل 6 اشخاص بقيت مديون ل 3 وكمان 3 متعاونين.

لو الدين كبير و صعب تقسطه؟
لو واحد من الاشخاص رفض يقسط الديون و عايز فلوسه فجأة حاول تفاوضه علي انك تدفع نص المبلغ مقدم و تقسط الباقي و لو رفض و بقي رخم . اطلب منه مهلة صغيرة و اعمل اللي هقولك عليه
اللي هقوله ده حاجة غريبة شوية بس الظروف حكمت و دي الحالة الوحيدة اللي تعمل فيها كدة

انك تستلف تاني ! ايوة بس بشروط,  تروحل حد ثقة و تطلب منه المبلغ ده سواء المقدم او المبلغ كامل بس بشرط و احد انك هتسدد المبلغ ده علي اقساط . اهم حاجة انك توصل الديون لاقساط صغيرة , هو ده الحل اللي هيخليك تضمن انك تخلص من ديونك.

زود دخلك
عشان تخلي عملية التخلص من الديون اسهل و اسرع دور علي طرق تزود بيها دخلك , اطلب ساعات اضافي من مديرك و لو انت شغال كويس و كفائه و بقالك فترة اطلب منه زيادة في المرتب حتي لو 5 في الماية , ممكن تزود دخلك انك تشتغل شغل تاني نص دوام او مؤقت بعد الظهر , و ممكن تعمل خدمة لحد مقابل فلوس زي انك توصل حد من اصدقائك المطار او مشوار بعيد مقابل مبلغ معين و انت اولي من تاكسي  , ممكن تشترك في خدمات التوصيل زي اوبر ممكن لوعندك مهارات معينة تستغلها في انك تدخل فلوس علي جنب كدة , اي حاجة زيادة علي مرتبك طبعا تتوجه لسداد الديون طبقا للاولوية اللي حددتها الاول
بيع شوية حاجات مش عايزها لو عندك شوية حاجات مركونة و ليها قيمة لحد تاني ممكن تعرضها للبيع , مثلا موبايل قديم , مهما كان قديم ليه تمن حتي لو قطع غيارلو عندك حاجتين بيعملو نفس الحاجة اخلص من واحدة منهم مثلا  لوجبت مكواة بالبخار و القديمة مركونة في المخزن طلعا و بيعها

اعمل حساب للطوارئ
الخطوة دي ممكن تاخر دفعك للديون بس هي مهمة لتلافي انك تستلف تاني و تواجه اي مصاريف مفاجأة خلي 5 في ماية مثلا من فلوسك كل شهر تروح للحساب ده .
في الحالة المثالية في المستقبل بعد التخلص من ديونك , يفترض ان حساب الطوارئ يكون فيه مصاريف تكفي 6 شهور , و ده مفيد في حالة الاستقالة المفاجأة او حدوث مصاريف غير متوقعة تسحب من الحساب ده و تقض المصلحة و بعدين تسدد بالتدريج

ازاي تمنع حصول مشاكل زي كدة
ادرس ايه الحاجات اللي بتخليك تصرف فلوس كتير فجأة , يعني قرار شراء مفاجئ او مصاريف تصليح مفاجأة او مع الوقت هتتعلم وقت حصول المواقف دي , و تعرف تتوقعها و تحوش فلوس ليها