كيفية شراء سيارة جديدة او مستعملة بافضل سعر ممكن

من اكثر القرارات المهمة واللي بتكلفك مبلغ كبير ممكن يوصل لمرتب سنة او اكتر ممكن توفر فلوس كتير فيها بمجهود بسيط و شوية بحث 
هحاول اساعدك تقيم القرار بحيث شراء العربية يوفرلك فلوس و يريحك ويكون سبب سعادتك بدل ما تختار عشوائي كدة و تكلفك اكتر من المتوقع و تكون سبب في اكتئابك طول الوقت. 

 انت عايز العربية فعلا ؟

ممكن تكون عايز تشتري العربية عشان تعمل زي الناس و لما مثلا بتجيب سن معين بيبقي حاجة لطيفة انك يكون معاك عربية لازم تجاوب علي السؤال ده فعلا و بصدق لانها مسؤلية كبيرة و في حالة الاختيار السيئ هيبقي قرار مضراكتر منه مفيد , اسأل نفسك الاسئلة دي
1-انا عايز اشتري عربية ليه؟
مثلا انا تعبت من المواصلات و شراء العربية هيريحني و هيوفر عليا فلوس كتير علي المدي البعيد خصوصا في المشاوير البعيدة زي الساحل او زيارة لحد من قرايبنا بدا ما تاكسي يتحكم فيا و يذلني او ملاقيش اصلا في اوقات متأخرة و لا حاجة
2-في بديل لموضوع شراء العربية ؟ ممكن اعمل حاجة مفيدة اكتر بالفلوس لو مش هشتري العربية ؟
 اروح الشغل او المشاوير القريبة بمواصلات عادي و في المشاوير البعيدة ااجر عربية و فلوس اللي انا محوشها للعربية ممكن استغلها في حاجة تانية و ممكن ااجل القرار ده مثلا لغاية لما الاولاد يدخلوا المدارس و هكون محتاجها فعلا.

طيب نتوكل علي الله و نمشي في خطوات شراء العربية
هات ورقة و قلم و جهز نفسك عشان تجاوب علي الاسئلة دي

ايه هي استخداماتك للعربية ؟ 

عايز عربية كبيرة و لا صغيرة و لا van  و لا دفع رباعي بحكم شغلك بتدخل اماكن الارض فيها و حشة او صحراوية
حدد نوع العربية و بعدين اعمل ليستة بالعربيات المرشحة

ايه الميزانية اللي معاك ؟ 

معاك كام ؟ ده هيفرق طبعا في حاجتين انك هتشتري جديد ولا مستعمل و لو مستعمل هتشتري موديل كام 

هتخليها معاك كام سنة ؟

رتب نفسك العربية هتفضل معاك كام سنة عشان تعرف تقدر القرار الشراء صح , لو هتشتري عربية جديدة مثلا و بعتها بعد سنة ده قرار سيئ جدا لان اكبر نسبة نقص في سعر العربية بتحصل في اول سنة او سنتين و بعدين سعرها بيقل ببطء يبقي الافضل تشتري مستعمل لو ناوي تجيب العربية و تبدلها بعد وقت قليل , علي العموم اقل حاجة العربية المفروض تقعد معاك 5 سنين و كمان متوسط 10 لو تقدر تخليها تعيش معاك 10 ل 15 سنة هتديك افضل قيمة ليها و في الحالة دي افضل انك تشتري جديد عشان تعيش معاك الفترة دي.

مستعملة ولا جديدة؟ 

دي نقطة مهمة و في ناس بيختلفوا فيها من ناحية التوفير

الراي الاول : طبعا عربية مستعملة ارخص بكتير و لو جبتها من واحد محافظ عليها و اهتميت انت كمان بيها هتعيش معاك فترة طويلة والعربية الجديدة بتفقد من 10 ل 15 في الماية من تمنها اول لما تخرج من المعرض و كمان العربيات القديمة تكلفة تصليحها ارخص مش هتبقي مجبر علي مركز خدمة او وكيل عشان الضمان و ممكن تصلحها عندي اي ميكانيكي

الطرف التاني : هات جديدة بالقسط و هتريح دماغك من انك تلف الشوارع و تشوف العربيات المستعملة و الناس تضحك عليك و فيها مخاطرة انك تلبس برضو , لما تجيب جديد هتضمن انك مش هتصلح فيها حاجة قبل 5 سنين و الفلوس اللي انت وفرتها من الفلوس التصليح هتدفع بيها الاقساط و مع الوقت هتخلص الاقساط و يبقي معاك عربية لسة حديثة بعد 5 سنين , كمان العربيات الجديدة فيها تكنولوجيا احدث وبتوفر في البنزين اكتر 

في الحقيقة انا اميل لانك تشتري العربية جديدة وخليها معاك 10 ل 15 سنة و الفلوس الزيادة عن المستعمل هتتعوض علي المدي البعيد بس لو انت صغير في السن انصحك تشتري عربية مستعملة و رخيصة عشان زي ما بيقولوا "تتعلم فيها " غالبا العربية هتتخبط كتير و مش هتخسر كتير فيها و بعد سنة او اتنين بيعها و اشتري جديد بالقسط

خلينا نكمل عملية اتخاذ القرار علي اساسانك هتشتري جديد

عايزين نوصل اننا نحدد المصاريف الشهرية و هتقدر عليها و لا لأ

 مصاريف التشغيل 

استهلاك الوقود
اعمل بحث كويس و اختار عربية استهلاكها للبنزين منخفض بالمقارنة بغيرها في نفس الفئة , غالبا هتلاقي معدل استهلاك الوقود بيتكتب مثلا 7 ليتر/100 كم و دي معناها ان العربية بتستهلك 7 بنزين لكل 100 كيلومتر هتمشيهم و ده رقم متوسط ما بينالسواقة علي سرعة عالية و متوسطة و كمان من غير حركة -العربية بتحرق بنزين بنسبة قليلة و هي واقفة عشان الموتور يفضل شغال , نظريا ممكن تحرق بنزين كتير من غير ما تمشي كيلومتر واحد - فرق ليتر ما بين عربية و التانية يعمل مبلغ محترم علي المدي البعيد مثلا هتمشي في السنة متوسط 40 الف كيلومتر و لو في عربية استهلاكها اقل 1 ليتر من عربية تانية ممكن توفر عليك الاف
خلينا نحسبها
العربية هتوفر عليك 1 ليتر لكل 100 كيلو
يبقي العربية هتوفر عليك س من الليترات ل 40000 كيلو
س يساوي 400 ليتر بنزين
اضرب في سعر البنزين مثلا 4 جنيه يبقي 1600 جنيه في السنة توفير ممكن تشتري بيهم قطع غيار مهمة للعربية

فلوس للجراج و غسيل العربية 

لازم تحسب الفلوس بتاعت الجراج عند بيتك و كمان فلوس الباركينج اللي بتدفعها كل لما تروح مشوار في مكان زحمة و الركنة بفلوس , اسأل واحد من اصحابك اللي معاهم عربية نظام حياتهم قريب منك بيدفعوا متوسط كام في الركنة و بعدين زود 20 في الماية علي الرقم ده , اغلب الناس مش بيحسبوا بالفلوس دي بس بتجمع رقم كبير في اخر الشهر , برضو اعمل حساب فلوس غسيل العربية بمتوسط مرة في الاسبوع سواء في محطة و لو حد عنك زي البواب او السايس بيقوم بالمهمة دي.

مصاريف الصيانة

هنتكلم عن مصاريف الصيانة الثابتة و غالباهنحسب التكلفة السنوية و نقسم بعد كدة علي 12 شهر , العربيات بتمشي في السنة متوسط 30 ال 40 الف كيلومتر احسب علي كدة
كام مرة هتغير زيت مع الفلتر؟ مثلا مرة كل 5 الاف مثلا او علي حسب نوع الزيت يبقي تقريبا 7 ل 8 مرات واضرب في تكلفة التغيير
الكاوتش بيكلفك مبلغ محترم و دي حاجة مهمة الاهمال فيها بيأثرعلي عمر العربية و ممكن يعرضك للخطر لو اهملته و حالته بقت سيئة برضو تابع الدليل و شوف بيتغير كل قد ايه , برضوا تقريبا مرة كل 40 او 50 الف كيلو للنوعيات الاصلية و اقل شوية للنوعيات المتوسطة الكاوتش ممكن يوصل لالف جنيه للكاوتش الواحد و في اغلي من كدة فبلاش تهمل حساب حاجة زي كدة
احسب التكلفة لكل حاجة متوقعة للعربية مقارنة بعدد الكيلومترات في السنة و بعدين اقسم علي 12
فلتر هواء , فلتربنزين, بطارية , .. الخ
يبقي دي تكلفة الصيانة الشهرية اللي تعمل حسابك عليها

التامين

التامين مهم و بيجبرك عليه القانون يبقي تشوف شركة كويسة و تتفق معاها كدة كدة هتدفع الفلوس يبقي استغلها في حاجة كويسة عشان في وقت الحادثة لاقدر الله هعوضك الشركة و تصلح العربية , اغلب الناس شايفين انه ملوش لازمة بس عشان في احتمالية قليلة انهم يعملوا حوادث بس هما دول اكتر ناس محتاجينه !

مصاريف التصليح 

اعمل حساب ان العربية هتعطل او تتخبط فخلي مبلغ معين رقم ثابت و لما بتصرف منه بتعوضه بالتدريج خليه علي جنب للحاجات المفاجأة , فرص العطل بتقل لو انت مهتم بالعربية و ملتزم بصيانتها و كمان بتسوقها بطريقة مناسبة من غير ما تمشي في شوارع مخبطة و غيرها


بس كدة اجمع التكلفة الكاملة لقسط العربية زائد مصاريف التشغيل : مصاريف الصيانة و التامين و الجراج و غيرها
و شوف الرقم ده هتقدر عليه كل شهر ولا لأ , لو الرقم كبير شوف عربية تانية بسعر اقل و اعمل حساباتك من اول و جديد

الاماكن اللي هتشتري منها

في حالة الجديد

اعمل بحثك كويس المعارض بتختلف في اسعارها في حدود الفين لغاية 5 الاف و ممكن اكتر للموديلات اللي معليهاش حركة و كمان لو وسعت دايرة البحث خارج المدينة اللي انت فيها هتعرف تلاقي اسعار مناسبة , شوف الموقع الاليكتروني او اتصل عليهم و اسألهم علي الاسعار و ايه اخرهم في السعر و سجل الكلام ده في ورق عندك و بعدين اختار اقل سعر او اتنين و روح المعرض .

المستعمل
مفضلش تروح معارض اللي بتبيع مستعمل او تتعامل مع سمسار عشان عايزين يكسبوا و خلاص و هيضحكو ا عليك والدنيا دلوقتي احسن من زمان موجود عندك مواقع اليكترونية بتعرض عليها العربيات المستعملة بالصور و المواصفات بمجرد بحث بسيط هتلاقي الموديل اللي انت عايزه بالظبط معروض للبيع عند 100 واحد نقي اللي يعجبك و اتصل و روح عاين و اتفق علي السعر.

طريقة التعامل مع مسئولي المبيعات 

اغلب مسئولي المبيعات يهمهم حاجة واحدة , انهم ياخدوا نسبتهم ! و ممكنيعملوا اي حاجة عشان يقنعوكانك تشتري عربية معينة و كمان بمواصفات اعلي عشان يرفعوا سعرها و نسيبتهم تزيد في نفس الوقت , خليك محضر نفسك حدد نوع العربية و موديل السنة و الكماليات و حتي اللون و روح قولو انك عايز العربية دي بالذات , لو معندوش سيبه و امشي و روح لغيره متضيعش وقتك في مفاوضات من غير نتايج , افضل انك تاخد معاك حد بيفهم في العربيات و ليه في الفصال و الجدال , اطلعمن المعرض باي حاجة حتي لو دواسات مجانية

افضل وقت للشراء
افضل وقت بيبقي اخر السنة عشان المعارض بتبقي بتقفل الميزانية و عايزين يطلعوا باي مكسب و يعدو ارقام المبيعات اللي متفقين عليها مع الوكيل و ممكن يبيعلك من غير مكسب عشان يوصل لارقام مبيعات كويسة , استغل الوقت ده و اطلع منهم بافضل سعر.