الفرق بين البخيل والموفر

 مش معني انك تكون بتوفر في كل حاجة هيبقي معاك فلوس اكتر , الكلام ده جزئيا صح بس في نسبة غلط عشان العالم اللي احنا في مش مثالي و مش كل المعلومات بتبقي في ايدينا و بنبص للموضوع من ناحية واحدة 

الحاجة المشتركة بين الاقتصادي و البخيل انهم عايزين يوفروا فلوس بس الموفر يعرف شوية حاجات اكتر من البخيل بتخليه يصرف اقل و يعيش حياة افضل و بضغوط اقل

مثال 

تشتري عربية زيرو موديل السنة و فيها كماليات و شكلها حلو و كدة بس هتكلفك اكتر من تمنها عشان الاقساط و كمان سعرها مش قليل لوحده و فيها تكييف و abs و غيرها 

تشتري عربية صغيرة ومستعملة و حالتها مش قد كدة بس سعرها حلو ممكن يوصل لنص تمن عربية جديدة و بعدين في الاخر انت مش محتاج غير حاجة توصلك من نقطة أ لنقطة ب  و انت مش مهتم بالرفاهيات و اهم حاجة انك توفر الفوس دي انت اولي بيها 

الاجابة واضحة العربية التانية طبعا هوفر نص الفلوس احنا اولي بيها يا عم 

في الحقيقة المثال ده ناقصة معلومات كتير زي مثلا استهلاك البنزين بتاع العربيتين و نوعه ممكن الجديدة لازم يكون بنزين 95 بس و ده هيفرق معاك في الميزانية و كمان ايه هي حالة العربية القديمة و ايه مدي اهتمام صاحبها القديم بيها ممكن تصرف عليها تصليحات تكلفك مبلغ كبير انت مش قده 

علي العموم في موضوع كامل عن كيفية اختيار و شراء العربية بسعرمناسب 

نرجع لموضوعنا ايه الفروقات اللي بين البخيل و الموفر؟

الموفر عارف اولوياته 

 ايه هي اولوياتك ؟ يعني مثلا ايه الحاجات اللي انت بتستخدمها كتير وهيكون ليها تاثير علي ادائك او حالتك النفسية ؟
خلينا نشوف مثال

لو انت مصمم جرافيكس و ده شغلك و مصدر رزقك و بتستخدم الكمبيوتر 8-10 ساعت في اليوم و عايز تشتري لابتوب كويس طبعا الموضوع مفيهوش كلام لازم تشتري حاجة فيها اعتمادية عالية عشان مجهودك ميروحش علي الفاضي ممكن لو جهاز تعبان يسخن ولا حاجة و يقفل فجأة و كل شغلك راح و ده ممكن يكون سبب اساسي لخسارة جزء من مرتبك عشان مخلصتش شغلك في معاده غير التعب النفسي اللي حصلك نتيجة قرار بانك توفر الف او اتنين حتي لو اشتريت لابتوب اغلي 10 مرات من المتوسط علي المدي البعيد ده هيفرق معاك في ادائك و شغلك و حالتك النفسية .

ممكن القرارده يتغير لو انت جايبه للتسلية و بتفتحة ساعة او اتنين كل يوم تتفرج علي افلام او يوتيوب مش هيحصل حاجة لو الجهاز قفل فجأة مرة او اتنين في لشهر لان ده مش من اولوياتك و حتي لو عدي يوم اتنين من غير لابتوب مش هياثر علي حياتك في الحالة دي ركز علي حاجة امكانياتها معقولة و سهل تتصلح و معروفة في السوق و سعرها كويس .

طبعا الاولويات مش حاجات بتشتريها و بس الموضوع بيمتد لاستثمارك في العلاقات و النظر علي المدي البعيد اعتقد من الافضل انك تخلي ابنك يسافر مرة لمكان برة او جوة بلده عمره ما شافه قبل كدة و يتبسط هناك او يستفيد بتجربة جديدة او حتي يستمتع بوقته هناك اكيد مش هينسي حاجة زي كدة طول عمره و هيقدرك جدا اعتقد ان قيمة حاجة زي كدة افضل بكتير من انك تصرفها في ممتلكات مش ضرورية او حتي تحوش الفلوس و خلاص .

الموفر عارف الفرق بين السعر و القيمة 

ايه هي القيمة ؟ قصدك تمنها يعني ؟ 

لا مش السعر بس هي تعتبر القيمة الفعلية للشيء بعد تجميعك لمعلومات كافية و اتخاذك للقرار ده علي حسب اولوياتك و ساعتها لو بتشتري حاجات ممكن تشوف انها غالية جدا بسانت عارف انها  هتعيش معاك فترة طويلة بعد ما عملت بحثك كويس .

الراجل البخيل دايما بيشتري ارخص حاجة و خلاص بس ممكن يلاقي ان الحاجات دي بتبوظ و في الاخر بيصرف اكتر من الراجل الاقتصادي .

شوية حاجات اضافية المفروض تعرفها لو عايز تبقي بتوفر صح 
معرفتك لمعلومات كافية بيساعدك لاتخاذ قرار واثق و من غير تردد او ندم

مصاريف التشغيل 

القيمة مش ان الحاجة تعيش عمر طويل و خلاص ممكن تكون بتكلفك مصاريف تشغيل كبيرة  من غير ما تعرف 

خلينا نرجع لمثال العربية 

خلينا نخلي المقارنة في استهلاك البنزين بس يعني عندك اختيار بين عربيتين بس مثلا في عربية استهلاكها اعلي من التانية بفرق ليتر لكل 100  كيلومتر 

طبعا بعد ما تمشي 100 الف كيلو متر هتوفر الف ليتر بنزين اضرب في تمن الليتر هتوفر مثلا 3500 جنيه 

قرار العربية معقد اكتر من كدة بس ده للتوضيح

مصاريف الصيانة مهمة و ده مرتبطة بالنقطة اللي تحت 

اي حاجة محتاجة صيانة واهتمام عشان تعيش معاك فترة اطول و كمان مصاريف الصيانة بتختلف بين الحاجة التانية , مثلا لو اشتريت شقة في القاهرة غير لما تشتري شقة في اسكندرية علي البحر
شقة القاهرة هتكلفك صيانة للتكييف كل سنة عشان الجو صعب شوية في القاهرة و ملوث , شقة اسكندرية ممكن تكلفك دهانات كل 3 اربع سنين او اقل بسبب الرطوبة في الجو علي الرغم من انها مش محتاجة تكييف

المدة او العمر الافتراضي 

 تشتري حاجة هتعيش معاك سنة و تبوظ و لا حاجة تكمل معاك اكتر من 3 اواربع سنين و ممكن لو اهتميت بيها و صيانتها هتعيش معاك سنتين كمان او اكتر .

العوامل الاخري الغير مالية (العوامل الاهم ) 

في المثال بتاع المصمم ده ممكن من الافضل انه يشتري جهاز معين حتي لو نفس مواصفات جهاز تاني بس اغلي منه الف او اتنين , و السبب ان الشاشة الوانها مريحة و مش مؤذية للعين حتي لو ده ملوش تاثير علي صحة عينيك ايه لازمة الفلوس اللي وفرتها لو هتقعد 10 ساعات قدام شاشة مش مستريح من الوانها او ممكن تجيبلك صداع في بعض الاحيان ليه تكدر نفسك 

اهم حاجة حالتك النفسية و راحتك لو معاك فلوس كافية و انت مش مقصر في البنود التانية في ميزانيتك لي تحرم نفسك من حاجات انت قادر عليها , مش مطلوب منك انك توفر بهدف التوفير ايه فايدة الفلوس اللي وفرتها بس عشت 10 او 15 سنة متكدر و عينيك وجعتك او ظهرك و جعك من كرسي رخيص او من توتر حصل بسبب تاخير في الشغل بسبب جهاز عطل في وقت مش مناسب لو عايز ايفون و معاك فلوسه هاته يا عم ليه تجيب حاجة مش علي هواك عشان توفر فلوس و خلاص 

انك تعيش باقتصاد مش حاجة وحشة انت لازم تقدر نفسك قبل ما تقدر الفلوس انت اللي بتعمل الفلوس و عشان تصرفها علي نفسك و علي اولادك مش حد تاني