اغني رجل في بابل

 بداية زمان  كنت كل لما بعوز حاجة كنت بحوش تمنها و اجيبها كنت تقريبا بقطع صرف المصروف لعدة ايام , تخيلوا عذاب واحد بيحرم نفسه من حلويات وغيرها اكتر من يومين ثلاثة و كل ده عشان يجيب حاجة تانية , هي غالبا كانت حلويات تانية بس اغلي شوية :) , ده كان مبدائي لفترة كبيرة من حياتي عيش حياتك عادي و اصرف و لما تعوز حاجة معينة حوشلها و تعالي علي نفسك شوية و هتجيبها و هكذا بس مع الوقت الحاجات اللي بعوزها بتكبر و ووقت التحويش بيبقي اطول و العذاب اكتر في ناس لغاية دلوقتي عايشين علي المبدأ ده و بيصرفوا كل اللي في جيبهم و الظروف هي اللي بتتحكم فيهم

المهم وقع تحت ايدي كتاب اغني رجل في بابل و ده غير فكرتي عن التحويش و كمان ممكن تنتقل لمرحلة انك تبقي غني و مش هتستني اي حاجة عشان تجيبها

فكرة بسيطة عن الكتاب 

الكتاب بسيط جدا و سهل في القراية و المثير للاهتمام انه الناس من زمان عندها مشاكل مالية زي ما عندنا دلوقتي بس هما لقوا حلول من زمان واستخدموها و نجحت معاهم و احنا لسة بنلف حوالين نفسنا عشان نخرج من الدوامة دي 

بس الفكرة ان القرار في ايدينا و قرار انك تبقي غني او لا في ايدينا احنا بس 

 مش هلخص الكتاب ولا حاجة هو مسلي جدا في القراية  بس هقول اهم المقولات اللي لفتت انتباهي 

"السبب في عدم كسبكم المال اكثر مما يكفي لتعيشوا حياة متواضعة في تلك السنوات التي تلت شبابنا يرجع الي انكم قد فشلتم في تعلم القوانين التي تحكم بناء الثروة او انكم لم تلتزموا بها "

"لابد ان تحتفظ بجزء من ايرادتك و يجب الا يكون هذا الجزء اقل من العشر مهما كانت ايرادتك متواضعة ربما يكون هذا العشر اقل مما تسطتيع تحمله ولكن يجب ان تدفع لنفسك اولا" 

"اذا اردت ان تحصل علي نصيحة بشان الجواهر اذهب الي تاجر جواهر ..... ان النصيحة شيئ من السهل علي الناس منحه و لكن تأكد من انك لا تاخذ نصائح الا ما يستحق ان تأخذه "

"قوة الارادة ! ما احمق ما تقول هل تعتقد ان قوة الارادة تعطي الانسان القوة لكي يحمل ثقلا لا يستطيع الجمل ان يحمله او يجر حملا لا تستطيع الثيران ان تزحزه" 

"ان قوة الارادة ليست سوي التصميم الذي لا يلين علي اداء مهمة قد اخذت علي عاتقك ان تنجزها فاذا ما حددت لنفسي مهمة فسوف انجزها مهما كانت تفاهتها فإذا لم افعل ذلك فكيف ستكون لدي الثقة بنفسي للقيام بالاشياء المهمة ؟ "

الكتاب فيه كلام كتير مهم وفي ترجمة النصوص اللي لقوها و كمان فيه حكاية الكاتب اللي جرب يمشي علي النصايح اللي لقاها في النصوص دي و ازاي قدر يحل مشاكله المالية

طب ينفع نطبق الكلام ده دلوقتي ؟ 

احنا دلوقتي في المستقبل و لسة مش عارفين نحل مشاكلنا المالية بس الحلول بسيطة و تحتاج القليل من المجهود
البداية قرار بالاستقلال المالي
و بعد كدة اعمل نظام لحياتك و التزم بيه
شوف ده اسهل نظام من الاف السنين و لغاية دلوقتي بينفع

• ادخر لنفسك علي الاقل 10 في المائة من دخلك و تعود علي العيش بالباقي لاتتوقف عن الادخار ابدا
• عند تجميع مبلغ كافي استثمرهم مع اهل خبرة
• اعد استثمار ما ربحته مع زيادة استثماراتك من مدخراتك ايضا
• مع الوقت ستجد ان المال يعمل كخادم لك و يزيد مع الوقت مع مراعاتك له بالطبع

طبعا فيه دلوقتي في حاجات متقدمة و ممكن تخلي الموضوع احسن بس علي الاقل اول خطوة مهمة وموجودة في كل الانظمة

اقرا الكتاب اعتقد ممكن تلاقي حتي لو جملة واحدة تغيرافكارك و تنقلك نقلة تانية